Жетісу облысында Жұмысшы мамандықтар жылы салтанатты түрде қорытындыланды
Жетісу облысы бойынша Жұмысшы мамандықтар жылының жабылу салтанаты өтті. Іс-шара барысында жыл бойы еңбек адамының беделін арттыруға, техникалық және кәсіптік білім беруді дамытуға бағытталған жұмыстардың қорытындысы шығарылды.
Салтанатты жиында өңірдің үздік педагогтары, өндірістік оқыту шеберлері, колледж студенттері марапатталып, халықаралық және республикалық деңгейдегі кәсіби шеберлік байқауларында, оның ішінде WorldSkills Kazakhstan 2025, TurcikSkills, WeldingSkills, AgroLeague, AstauFest чемпионаттарында жеңіске жеткен үздіктерге құрмет көрсетілді.
Сонымен қатар дуальды оқыту жүйесін дамытуға үлес қосқан колледждер, кәсіпорындар мен тәлімгерлер «Кәсіби маман» конкурсы аясында арнайы номинациялармен марапатталды.
Жұмысшы мамандықтар жылы - жастардың кәсіби әлеуетін ашуға, еңбекке деген құрметті нығайтуға және білікті кадрлар даярлауға бағытталған маңызды кезең ретінде өз мәресіне жетті.